مدونة جيل موهوب: محمد عبد الحميد وخالد عبدالحميد

- كابتن محمد عبد الحميد

- كابتن خالد عبد الحميد

كابتن خالد وكابتن محمد قصتهم بتاخدنا لعالم مختلف شوية، عالم الMMA "Mixed Martial Arts" اللي هي رياضة بتسمي "رياضات القتال المتنوعة" ودي رياضة انتشرت عالميا في السنين الأخيرة انتشار رهيب وبقت من أشهر الرياضات في العالم وهي عبارة عن مقاتلين بيتفننوا في كذا نوع من انواع القتال أبرزهم "الجيوجيتسو البرازيلي، الكيك بوكسينج، المواي تاي" والمقاتلين دول بينزلوا في حلبة عبارة عن قفص ثماني وبيتقاتلوا قتال شرس وقوي جدا بس في نفس الوقت ملئ بالأخلاق والروح الرياضية. والرياضة دي معروفة لينا في الوطن العربي عن طريق بطولات UFC و Desert force اللي بنشوفهم في التليفزيون وهي رياضة بتحتاج قوة وذكاء ولياقة عالية.

علي المستوي المهني:

- كابتن محمد عبد الحميد:

بطل العالم في الkick boxing الوزن الخفيف سنة 2005 وسنة 2009 وهو دلوقتي مقاتل ومدرب MMA لأبطال كتير مصريين. وهو مدرب بارع وصبور جدا علي اللاعبين بتوعه وذكي وبيقدر يوصل للعيبة بتاعته بكل بساطة ويفهمهم ويعلمهم بكل سهولة

وبساطة واحترافية ويصنع منهم مقاتلين MMA وأبطال فوق ما هم أبطال أصلا.

فيديو Highlights لكابتن محمد:

- كابتن خالد عبد الحميد:

مدرب MMA ومدير أعمال ورئيس الاتحاد المصري للفنون القتالية المتنوعة، وأول مصري يتم اختياره ليكون عضو فى الاتحاد الدولى للرياضات القتالية المتنوعة الIMMAF اللي مقره في لاس فيجاس. وهو مدرب وبارع جدا في التحالفات والادارة والتنظيم ومتحدث بارع ومفاوض ناجح جدا

كابتن محمد وكابتن خالد فضلوا ورا حلمهم اللي حلموه من ساعة ظهور رياضة ال MMA وكان حلمهم انهم يخلوا الرياضة دي بتمارس في مصر بشكل كبير وليها بطولات بل وفرق وكمان لعيبة بتسافر تلعب بطولات دولية في رياضة الMMA ورياضات تانية كمان زي الكيك بوكسنج والمواي تاي، وساهموا بشكل كبير جدا في رسم ملامح الرياضة دي في مصر من أول ما كانت لسة رياضة وليدة في مصر وبتمارس من عدد قليل من الناس، وقدروا يساعدوا في انها تبقي رياضة تمارس من عدد كبير من الناس، وده حصل عن طريق اقناع عدد من لاعبي الرياضات القتالية الآخري انهم يمارسوا رياضة الMMA وتدريبهم بصورة مكثفة علشان يوصلوا لمستوي عالي جدا في لعبة ال MMA وده بجانب فتح المجال للأجيال الصغيرة انها تبدأ مشوارها مع اللعب القتالية من الMMA علي طول.

و كمان قدروا يكونوا فريق الEgyptian top team وهو فريق ضخم جدا بينافس في بطولات دولية كبيرة جدا وحاليا فيه ناس من أفضل المقاتلين في مصر بيلعبوا في الفريق ده وبيلعبوا في بطولات دولية، وده كله حصل في ظل ظروف صعبة جدا ومصاعب شديدة ومحاولات لتفشيلهم واحباطهم وبامكانيات عددية ومادية محدودة في البداية ومساعدات ومساندات من بعض أصدقائهم لاعبي الرياضات القتالية وبمجهود فوق العادي وقصة كفاح صعبة جدا. تقدروا كدة تقولوا الناس دي بدأت من نقطة الصفر في حلمهم وما يأسوش لحد ما وصلوا لتحقيق حلمهم الحمدلله وكل يوم بعد التاني بيكبروه أكتر وأكتر.

نبذة عن مجهوداتهم:

- في 2010 قاموا بانشاء الEFC Egyptian fighting championship أول بطولة منظمة باحترافية لل MMA في مصر واللي كانت حلم ليهم من مدة كبيرة وحققت المسابقة دي نجاح هائل وتم تكرارها بصورة دورية ثم تطورت الي بطولة الEvolution championship اللي تم الاعتراف بيها دوليا لأنها تتماشي مع السياق الدولي من حيث التنظيم وسلامة اللاعبين وغيرهم وده بعد انشاء اللجنة المصرية للMMA التي تم انشائها من خلال عضوية الكابتن خالد في ال IMMAF.